പാലക്കാട്: റെക്കോർഡ് ഭൂരിപക്ഷത്തിലാണ് പാലക്കാട് യുഡിഎഫിന്റെ രാഹുല്‍ മാങ്കൂട്ടത്തില്‍ വിജയമുറപ്പിച്ചത്. മണ്ഡലത്തില്‍ പടക്കം പൊട്ടിച്ചും മധുരം വിതരണം ചെയ്തുമാണ് പ്രവർത്തകർ രാഹുലിന്റെ വിജയം ആഘോഷിക്കുന്നത്.
അതേ സന്തോഷത്തിലാണ് രാഹുലിന്റെ കുടുംബവും. അടൂരില്‍ നിന്നെത്തിയ തന്റെ മകൻ പാലക്കാടിന്റെ എംഎല്‍എ ആകാൻ പോകുന്നതില്‍ സന്തോഷമുണ്ടെന്നാണ് രാഹുലിന്റെ അമ്മ ബീന പറയുന്നത്. കുടുംബത്തിന്റെ സന്തോഷം മാദ്ധ്യമങ്ങളോട് പങ്കുവയ്ക്കുകയായിരുന്നു രാഹുലിന്റെ അമ്മ.
‘മകന്റെ ലക്ഷ്യങ്ങളെല്ലാം നേടികൊടുത്തത് അവന്റെ പ്രസ്ഥാനമാണ്. വിജയത്തില്‍ വളരെയധികം സന്തോഷിക്കുന്നു. കഷ്ടപ്പെട്ടതിന്റെ പ്രതിഫലം കിട്ടിയതില്‍ സന്തോഷമുണ്ട്. പാലക്കാട്ടെ ജനങ്ങള്‍ മകനെ ഹൃദയത്തിലേറ്റി. അവരോടാണ് നന്ദി പറയുന്നത്. പാലക്കാട്ടേയ്ക്ക് താമസം മാറുമെന്ന് പ്രതീക്ഷയില്ലായിരുന്നു. ഇനി പാലക്കാട്ടുകാരിയായി ജീവിക്കും. മകന് പൂർണമായ പിന്തുണ നല്‍കിയിരുന്നു. കുടുംബത്തിന്റെയും കൂട്ടുകാരുടെയും പിന്തുണയുണ്ടായിരുന്നു. ചെറുപ്പത്തില്‍ മകൻ പാർട്ടിയില്‍ പ്രവർത്തിച്ചപ്പോള്‍ എതിർപ്പ് പ്രകടിപ്പിച്ചു. പിന്നീട് അവന്റെ താല്‍പര്യം രാഷ്ട്രീയമാണെന്ന് മനസിലാക്കിയതോടെ പിന്തുണയായി നിന്നു’-രാഹുലിന്റെ അമ്മ പറഞ്ഞു.
18,715 വോട്ടുകളുടെ റെക്കോർഡ് ഭൂരിപക്ഷത്തിലാണ് രാഹുല്‍ പാലക്കാട് വിജയിച്ചത്. ഷാഫി പറമ്ബിലിന് നേടിയതിനെക്കാള്‍ ഭൂരിപക്ഷത്തോടെയാണ് രാഹുലിന്റെ വിജയം. ഫലപ്രഖ്യാപനത്തിന് തൊട്ടുമുൻപും വലിയ പ്രതീക്ഷയാണ് രാഹുല്‍ പ്രകടിപ്പിച്ചത്. പിരായിരി പഞ്ചായത്തിലെ വോട്ടുകളാണ് ഒടുവില്‍ രാഹുലിന് തുണയായത്. പിരിയാരിയില്‍ 6775 വോട്ടുകളാണ് നേടിയത്. പോസ്റ്റല്‍ വോട്ടുകളിലും ആദ്യമണിക്കൂറുകളിലും മുന്നിലായിരുന്ന ബിജെപി സ്ഥാനാർത്ഥി സി കൃഷ്ണകുമാറിനെ ആറാം റൗണ്ട് മുതലാണ് രാഹുല്‍ പിന്നിലാക്കിയത്.
Add Comment