പാകിസ്താനെതിരായ ട്വന്റി 20 പരമ്പര തൂത്തുവാരി ഓസ്ട്രേലിയ

പാകിസ്താനെതിരായ ട്വന്റി 20 പരമ്പര തൂത്തുവാരി ഓസ്ട്രേലിയ. മൂന്നാം ട്വന്റി 20യിൽ ഏഴ് വിക്കറ്റിന്റെ വിജയം നേടിയതോടെയാണ് പാകിസ്താനെതിരായ ട്വന്റി 20 പരമ്പര ഓസ്ട്രേലിയ തൂത്തുവാരിയത്. മത്സരത്തിൽ ആദ്യം ബാറ്റ് ചെയ്ത പാകിസ്താൻ 18.1 ഓവറിൽ 117 റൺസിൽ എല്ലാവരും പുറത്തായി. മറുപടി ബാറ്റിങ്ങിൽ 11.2 ഓവറിൽ മൂന്ന് വിക്കറ്റ് നഷ്ടത്തിൽ ഓസ്ട്രേലിയ ലക്ഷ്യത്തിലെത്തി.

നേരത്തെ ടോസ് നേടിയ പാകിസ്താൻ ബാറ്റിങ് തിരഞ്ഞെടുക്കുകയായിരുന്നു. 41 റൺസ് നേടിയ ബാബർ അസം ടോപ് സ്കോററായി. ഹസീബുള്ളാഹ് ഖാൻ 24 റൺസും നേടി. ആരും വലിയ ഇന്നിം​​ഗ്സുകൾ കളിക്കാതിരുന്നതോടെ പാകിസ്താൻ വലിയ സ്കോറിലേക്ക് എത്തിയില്ല. ഓസ്ട്രേലിയയ്ക്കായി ആരോൺ ഹാർഡി മൂന്നും സ്പെൻസർ ജോൺസണും ആദം സാംബയും രണ്ട് വീതം വിക്കറ്റുകളും വീഴ്ത്തി.

മറുപടി ബാറ്റിങ്ങിൽ മാർക്കസ് സ്റ്റോയിനിസിന്റെ വെടിക്കെട്ടാണ് ഓസ്ട്രേലിയൻ വിജയം അനായാസമാക്കിയത്. 27 പന്തിൽ അഞ്ച് ഫോറും അഞ്ച് സിക്സും സഹിതം 61 റൺസെടുത്ത സ്റ്റോയിനിസ് പുറത്താകാതെ നിന്നു. ക്യാപ്റ്റൻ ജോഷ് ഇം​ഗ്ലീസ് 27 റൺസുമായി ശക്തമായ പിന്തുണ നൽകി. ജെയ്ക് ഫ്രെയ്സർ മ​ക്​ഗർ​ഗ് 18 റൺസുമെടുത്തു.