നടൻ വിജയിൻ്റെ രാഷ്ട്രീയ പാർട്ടിയുടെ പ്രഥമ സമ്മേളനം ഇന്ന്

ചെന്നൈ: നടൻ വിജയ് യുടെ രാഷ്ട്രീയ പാർട്ടിയായ തമിഴക വെട്രി കഴക(ടിവികെ)ത്തിന്റെ ആദ്യ സംസ്ഥാന സമ്മേളനം ഇന്നു വില്ലുപുരം ജില്ലയിലെ വിക്രവാണ്ടിയില്‍ നടക്കും.

85 ഏക്കറോളം വിസ്തൃതിയുള്ള മൈതാനത്തു കെട്ടിയുയർത്തിയ പടുകൂറ്റൻ സമ്മേളനനഗരിയിലാണു പാർട്ടിയുടെ നയവും പ്രത്യയശാസ്ത്രവുമൊക്കെ വിജയ് ഇന്നു പ്രഖ്യാപിക്കുക. വൈകിട്ട് 4ന് സമ്മേളനം ആരംഭിക്കും. 6നാണ് വിജയ് വേദിയിലെത്തുക. 110 അടി ഉയരത്തിലുള്ള കൊടിമരത്തില്‍, റിമോട്ട് ഉപയോഗിച്ചാണ് പാ‍ർട്ടിപതാക ഉയർത്തുക. തുടർന്ന്, 600 മീറ്ററോളമുള്ള റാംപിലൂടെ നടന്ന് പ്രവർത്തകരെ അഭിവാദ്യം ചെയ്ത ശേഷം വേദിയിലെത്തും.

ഏകദേശം അരലക്ഷം പേർക്ക് ഇരിക്കാനുള്ള കസേരകള്‍ തയാറാക്കിയിട്ടുണ്ട്. മറ്റുള്ളവർക്കായി കൂറ്റൻ വിഡിയോ വാളുകളുമുണ്ട്. തമിഴ്നാടിനു പുറമേ കേരളം, ആന്ധ്രപ്രദേശ്, കർണാടക എന്നീ സംസ്ഥാനങ്ങളില്‍ നിന്നുള്ള ആരാധകരും സമ്മേളനത്തിനെത്തുന്നുണ്ട്. വിക്രവാണ്ടി, വില്ലുപുരം, കൂടേരിപ്പാട്ട് തുടങ്ങിയ സ്ഥലങ്ങളിലെ നാല്‍പ്പതിലധികം ഹോട്ടലുകളില്‍ 20 ദിവസം മുൻപു തന്നെ പലരും മുറികള്‍ ബുക്ക് ചെയ്തിരുന്നു. ചെന്നൈയില്‍ നിന്നുള്ള ചിലർ സൈക്കിളില്‍ സമ്മേളനത്തിനെത്തുന്നുണ്ട്.

വിജയ്‌ക്കും മറ്റു വിശിഷ്ടാതിഥികള്‍ക്കുമായി 5 കാരവാനുകളും ഒരുക്കിയിട്ടുണ്ട്. സുരക്ഷയൊരുക്കാൻ അയ്യായിരത്തിലധികം പൊലീസുകാരെ നിയോഗിച്ചിട്ടുണ്ട്. മദ്യപിച്ചെത്തുന്നവരെ യോഗത്തിലേക്കു പ്രവേശിപ്പിക്കില്ലെന്നു പാർട്ടി നേരത്തേ തന്നെ അറിയിച്ചിരുന്നു.കൂടാതെ , റോഡ് നിയമങ്ങള്‍ കൃത്യമായി പാലിച്ചുവേണം പ്രവർത്തകർ സമ്മേളനത്തിനെത്താനെന്നും നിയമവിരുദ്ധ പ്രവർത്തനങ്ങള്‍ നടത്തരുതെന്നും വിജയ് ഓർമിപ്പിച്ചിട്ടുണ്ട്.