എരണം കെട്ടവൻ ഭരിച്ചാൽ നാടുമുടിയും, പിണറായിക്കെതിരെ രൂക്ഷ വിമർ‌ശനവുമായി കെ.മുരളീധരൻ

ഏറെ വിവാദങ്ങള്‍ക്കൊടുവില്‍ പാലക്കാട്ട് യുഡിഎഫ് സ്ഥാനാർഥി രാഹുല്‍ മാങ്കൂട്ടത്തിലിനായി പ്രചാരണത്തിനെത്തി മുതിർന്ന കോണ്‍ഗ്രസ് നേതാവ് കെ.

മുരളീധരൻ. പാലക്കാട് മേപറമ്ബില്‍ നടന്ന പ്രചാരണയോഗത്തിലാണ് മുരളീധരൻ പങ്കെടുത്ത് സംസാരിച്ചത്. മുരളിയുടെ പ്രസംഗത്തിനിടെ വേദിയിലെത്തിയ രാഹുല്‍ ഷാള്‍ അണിയിച്ചാണ് സന്തോഷം അറിയിച്ചത്. മുരളീധരൻ തിരിച്ചും രാഹുലിനെ ഷാള്‍ അണിയിച്ചു.

വോട്ട് ചോദിക്കുന്നത് യുഡിഎഫിനും കൈപ്പത്തിക്കും വേണ്ടിയാണെന്നും വ്യക്തിക്ക് വേണ്ടിയല്ലെന്നും പ്രസംഗത്തില്‍ മുരളീധരൻ പറഞ്ഞു. എഐസിസി പ്രഖ്യാപിച്ചാല്‍ പിന്നെ ആർക്കും മറ്റൊരു അഭിപ്രായമില്ലെന്നും അദ്ദേഹം പറഞ്ഞു. കെ. മുരളിധരൻ വരുമോ എന്ന് ചോദിച്ചുവർക്കുള്ള മറുപടിയാണിതെന്ന് വേദിയില്‍ നടത്തിയ പ്രസംഗത്തില്‍ രാഹുല്‍ പറഞ്ഞു.

തെരഞ്ഞെടുപ്പാണ് പ്രധാനമെന്നും മറ്റു വിഷയങ്ങളെല്ലാം അപ്രസക്തമാണെന്നും മുരളീധരൻ പറഞ്ഞു. പാലക്കാട്ട് യുഡിഎഫ് വിജയം ഉറപ്പാണ്. ഇവിടെ യുഡിഎഫും എല്‍ഡിഎഫും തമ്മിലാണു മത്സരം നടക്കുന്നത്. ഇവിടെ മത്സരം എല്‍ഡിഎഫ്-ബിജെപി സംയുക്ത സ്ഥാനാർഥികള്‍ക്കെതിരെയാണു മത്സരം നടക്കുന്നത്. പാലക്കാട്ടെ ബിജെപി സ്ഥാനാർഥിക്ക് വോട്ട് വേണ്ട, നോട്ട് മതി. ബിജെപി അപ്രസക്തമായിക്കൊണ്ടിരിക്കുകയാണ്. സന്ദീപ് വാര്യർ കോണ്‍ഗ്രസിലേക്കു വരേണ്ട ആവശ്യമില്ല. ഇവിടെ കാര്യങ്ങള്‍ നല്ല രീതിയില്‍ നടക്കുന്നുണ്ടെന്നും അദ്ദേഹം പറഞ്ഞു.

കേന്ദ്രത്തില്‍ ഒരു സർക്കാർ ഉണ്ടോ? വർഗീയത മാത്രം പ്രസംഗിക്കുന്നു പ്രധാനമന്ത്രി നരേന്ദ്ര മോദി. പൂരം കലക്കിയതുതന്നെ അല്ലേ. പിണറായി വിജയൻ ബിജെപിക്കൊരു എംപിയെ ഉണ്ടാക്കിക്കൊടുത്തു. പച്ചക്ക് വർഗീയത പറഞ്ഞ ഉദ്യോഗസ്ഥനെ പുറത്താക്കുന്നില്ലെന്നും കെ. ഗോപാലകൃഷ്ണൻ ഐഎസിന്റെ വാട്‌സ്‌ആപ്പ് ഗ്രൂപ്പ് വിവാദം സൂചിപ്പിച്ച്‌ മുരളി പറഞ്ഞു. മൂന്ന് സിവില്‍ സർവീസുകാരാണ് വിരമിച്ച ശേഷം ബിജെപിയില്‍ ചേർന്നത്. കെ. ഗോപാലകൃഷ്ണനെതിരെ നടപടിയെടുക്കാത്തതെന്താണെന്നും അദ്ദേഹം ചോദിച്ചു.

പിണറായി ഭരണം തുടങ്ങിയത് മുതല്‍ കേരളത്തിന് ദുരിതമാണെന്നും മുരളീധരൻ പറഞ്ഞു. പ്രകൃതി പോലും ക്ഷോഭിക്കുന്നു. എരണം കെട്ടവൻ ഭരിച്ചാല്‍ നാടു മുടിയും. പിണറായി ഭരണനേട്ടം പറഞ്ഞ് വോട്ടുപിടിക്കുന്നത് കേട്ട് ഇന്ത്യയിലെ എല്ലാ കണ്ടാമൃഗങ്ങളും വിഷമത്തിലാണെന്നും അദ്ദേഹം പരിഹസിച്ചു.