തിരുവനന്തപുരം: മദ്യപിച്ചെത്തി ബഹളം വച്ചത് ചോദ്യം ചെയ്തതിന്റെ ദേഷ്യത്തില്‍ അയല്‍വാസിയെ വെട്ടിക്കൊന്നു. കിളിമാനൂർ കാരേറ്റിലാണ് നാടിനെ നടുക്കിയ അരുംകൊല നടന്നത്.
കാരേറ്റ് സ്വദേശി ബാബുരാജാണ് കൊല്ലപ്പെട്ടത്. ഇന്നലെ രാത്രിയായിരുന്നു സംഭവം. പ്രതിയും അയല്‍വാസിയുമായ സുനില്‍ കുമാറിനെ കിളിമാനൂർ പൊലീസ് അറസ്റ്റ് ചെയ്തു.
സുനില്‍ കുമാർ മദ്യപിച്ച് ബഹളം വച്ചത് ചോദ്യം ചെയ്തതിന് പിന്നാലെയാണ് ആക്രമണമുണ്ടായത്. ഏറെ നേരം സുനില്‍ കുമാർ ബഹളം തുടർന്നിരുന്നു. ഒടുവില്‍ സഹികെട്ടാണ് ബാബുരാജ് സംഭവത്തില്‍ ഇടപെട്ടത്. ഇതില്‍ പ്രകോപിതനായ പ്രതി ബാബുരാജിനെ വെട്ടിക്കൊലപ്പെടുത്തുകയായിരുന്നു.
ബാബുരാജിനെ തിരുവനന്തപുരം മെഡിക്കല്‍ കോളേജ്‍ ആശുപത്രിയില്‍ എത്തിച്ചെങ്കിലും മരിച്ചിരുന്നു. സുനില്‍ കുമാർ നാട്ടിലെ സ്ഥിരം പ്രശ്നക്കാരനാണെന്നും മദ്യപിച്ചെത്തി പ്രശ്നങ്ങളുണ്ടാക്കുന്നത് പതിവാണെന്നും പ്രദേശവാസികള്‍ പറഞ്ഞു.
Add Comment