നടൻ ദിലീപിൻ്റെ ശബരിമല ദർശനം; വിജിലൻസ് പ്രാഥമിക റിപ്പോർട്ട് സമർപ്പിച്ചു

നടൻ ദിലീപ് വിഐപി പരിഗണനയില്‍ ശബരിമലയില്‍ ദർശനം നടത്തിയ സംഭവവുമായി ബന്ധപ്പെട്ട് വിജിലൻസ് പ്രാഥമിക അന്വേഷണ റിപ്പോർട്ട് ദേവസ്വം ബോർഡിന് കൈമാറി.

അന്വേഷണ റിപ്പോർട്ട് ദേവസ്വം വിജിലൻസ് എസ്പി ദേവസ്വം ബോർഡിന് കൈമാറി. പ്രാഥമിക റിപ്പോർട്ട് കൈമാറിയിട്ടുണ്ടെന്നും വിശദമായ റിപ്പോർട്ട് തിങ്കളാഴ്ച ഹൈക്കോടതിക്ക് കൈമാറുമെന്നും ദേവസ്വം എക്സിക്യൂട്ടീവ് ഓഫീസർ മുരാരി ബാബു പറഞ്ഞു. സിസിടിവി ദൃശ്യങ്ങള്‍ കോടതിക്ക് കൈമാറുമെന്ന് ദേവസ്വം ബോർഡ് പ്രസിഡൻ്റ് പറഞ്ഞു. ക്രമക്കേട് നടന്നിട്ടുണ്ടെങ്കില്‍ ശക്തമായ നടപടി സ്വീകരിക്കും.

നിലവില്‍ സന്നിധാനത്ത് ആർക്കും പ്രത്യേക പരിഗണന നല്‍കേണ്ടതില്ലെന്ന് ബോർഡും പോലീസും നിർദേശിച്ചിട്ടുണ്ടെന്ന് ദേവസ്വം ബോർഡ് പ്രസിഡൻ്റ് നേരത്തെ വ്യക്തമാക്കിയിരുന്നു.സംഭവത്തില്‍ ദേവസ്വം ബോർഡിനോട് ഹൈക്കോടതി വിശദീകരണം തേടിയിരുന്നു. വിഷയം നിസ്സാരമായി കാണാനാകില്ലെന്നും സംഭവത്തിൻ്റെ സിസിടിവി ദൃശ്യങ്ങള്‍ ഹാജരാക്കാൻ നിർദേശിക്കണമെന്നും കോടതി പറഞ്ഞു. നടൻ ദിലീപ് ഇന്നലെ ശബരിമലയില്‍ ദർശനം നടത്തിയിരുന്നു. നട അടയ്ക്കുന്നതിന് തൊട്ടുമുമ്ബ് ദിലീപ് ദർശനം നടത്തിയിരുന്നു. ഹരിവരാസനം കഴിഞ്ഞ് നട അടച്ച ശേഷമാണ് താരം മടങ്ങിയത്. കഴിഞ്ഞ ഏതാനും വർഷങ്ങളിലും ദിലീപ് ശബരിമല ദർശനം നടത്തിയിരുന്നു. ദിലീപിന് വിഐപി പരിഗണന ലഭിച്ചോ എന്നാണ് ഹൈക്കോടതി ഇപ്പോള്‍ പരിശോധിക്കുന്നത്.